शिक्षक समितीच्या शिष्टमंडळासोबत महत्त्वपूर्ण बैठक; वरिष्ठ व निवड श्रेणीसह पाच प्रमुख मागण्यांवर सविस्तर चर्चा
यशश्री अपडेट्स | धाराशिव :
जिल्ह्यातील प्राथमिक शिक्षकांच्या विविध प्रलंबित प्रश्नांना मार्गी लावण्यासाठी जिल्हा परिषद प्रशासनाने सकारात्मक भूमिका घेतली आहे. जिल्हा परिषद उपाध्यक्षा मा. सौ. उषाताई रवींद्र गायकवाड यांच्या अध्यक्षतेखाली महाराष्ट्र राज्य प्राथमिक शिक्षक समिती, जिल्हा शाखा धाराशिवच्या शिष्टमंडळासोबत शिक्षकांच्या प्रलंबित प्रश्नांबाबत महत्त्वपूर्ण बैठक पार पडली. या बैठकीत विशेषतः वरिष्ठ श्रेणी आणि निवड श्रेणीचा प्रश्न तातडीने मार्गी लावण्याबाबत चर्चा करण्यात आली. निवड श्रेणीचा प्रश्न निकाली काढण्यासाठी आपण सकारात्मक प्रयत्न करणार असल्याचे आश्वासन उपाध्यक्षा उषाताई गायकवाड यांनी दिले.
या बैठकीस माजी जिल्हा परिषद उपाध्यक्ष तथा जिल्हा परिषद सदस्य मा. धनंजय सावंत साहेब यांच्यासह जिल्हा परिषद सदस्य उपस्थित होते. तसेच माध्यमिक शिक्षणाधिकारी सुधा साळुंके मॅडम आणि प्राथमिक शिक्षणाधिकारी रवींद्र खंदारे साहेब यांचीही उपस्थिती होती.
महाराष्ट्र राज्य प्राथमिक शिक्षक समितीच्या शिष्टमंडळाने शिक्षकांच्या विविध प्रलंबित प्रश्नांबाबत सविस्तर निवेदन सादर करून त्यावर तातडीने कार्यवाही करण्याची मागणी केली.
बैठकीत पाच प्रमुख मागण्यांवर चर्चा
शिक्षक समितीच्या वतीने प्रामुख्याने खालील मागण्या मांडण्यात आल्या.
- वरिष्ठ व निवड श्रेणीचा प्रश्न : जिल्ह्यातील पात्र शिक्षकांना वरिष्ठ श्रेणी व निवड श्रेणीचा लाभ तातडीने मंजूर करून प्रलंबित प्रकरणे निकाली काढावीत.
- प्राथमिक पदवीधर शिक्षकांना वेतनश्रेणी : धाराशिव जिल्ह्यातील प्राथमिक पदवीधर शिक्षकांना सरसकट वेतनश्रेणी लागू करण्यात यावी.
- जिल्हा शिक्षक पुरस्कार वितरण : पात्र शिक्षकांना प्रोत्साहन देण्यासाठी प्रलंबित जिल्हा शिक्षक पुरस्कारांचे वितरण तातडीने करण्यात यावे.
- शाळांच्या वेळेत बदल : धाराशिव जिल्हा दुष्काळग्रस्त असल्याने अनेक भागांत तीव्र पाणीटंचाई निर्माण झाली आहे. या परिस्थितीचा विचार करून दिवाळीनंतर शाळा सकाळच्या सत्रात भरविण्यात याव्यात.
- शिष्यवृत्ती परीक्षा शुल्क माफी : इयत्ता चौथी व सातवीच्या शिष्यवृत्ती परीक्षेचे शुल्क माफ करण्यात यावे, अशी मागणी करण्यात आली.
या सर्व मागण्यांवर बैठकीत सविस्तर चर्चा करण्यात आली. शिक्षकांच्या अडचणी, प्रशासकीय अडथळे आणि विद्यार्थ्यांच्या हिताच्या दृष्टीने विविध मुद्दे प्रशासनासमोर मांडण्यात आले.
निवड श्रेणीच्या प्रश्नासाठी धनंजय सावंत यांचा पुढाकार
बैठकीत विशेषतः निवड श्रेणीचा प्रश्न निकाली काढण्यावर भर देण्यात आला. अनेक पात्र शिक्षकांना या लाभाची प्रतीक्षा असून, हा प्रश्न अधिक काळ प्रलंबित राहू नये, अशी भूमिका शिक्षक समितीच्या पदाधिकाऱ्यांनी मांडली. यावेळी माजी जिल्हा परिषद उपाध्यक्ष तथा जिल्हा परिषद सदस्य धनंजय सावंत यांनी निवड श्रेणीचा प्रश्न प्राधान्याने मार्गी लावण्यासाठी प्रशासनाला आवश्यक सूचना केल्या. पात्र शिक्षकांना नियमानुसार लाभ मिळावा आणि संबंधित प्रकरणांवर तातडीने कार्यवाही व्हावी, यासाठी त्यांनी प्रशासनाचे लक्ष वेधले.
जिल्हा परिषद उपाध्यक्षा उषाताई गायकवाड यांनी शिक्षक समितीने मांडलेल्या सर्व प्रश्नांची दखल घेतली. शिक्षकांचे प्रश्न सोडविण्यासाठी प्रशासनाच्या माध्यमातून सकारात्मक प्रयत्न केले जातील, अशी भूमिका त्यांनी व्यक्त केली.
शिक्षक समितीचे पदाधिकारी मोठ्या संख्येने उपस्थित
या बैठकीस महाराष्ट्र राज्य प्राथमिक शिक्षक समितीचे राज्य उपाध्यक्ष विलास कंटेकुरे, राज्य कार्यकारिणी सदस्य बापू बेताळे, मराठवाडा सरचिटणीस शिवाजी कवाळे, जिल्हाध्यक्ष रमेश बारस्कर, जिल्हा नेते बाबुराव कोकाटे, जिल्हा सरचिटणीस लक्ष्मण बनसोडे यांच्यासह सर्व तालुकाध्यक्ष व पदाधिकारी उपस्थित होते.
यामध्ये अंकुश गवळी, भीमाशंकर डोकडे, लक्ष्मण तानले, शिशुपाल पुरी, राहुल अपसिंगेकर, नागनाथ देशमुख, धन्यकुमार सुतार, शिवमूर्ती स्वामी, के. पी. राठोड, डी. डी. हुंडेकरी, संतोष हंगरगेकर, सतीश हुंडेकरी, शिवशंकर गाढवे पाटील, सचिन पाटील, अवधूते सर, अतुल भांडेकर, नागेश बंगले सर, अर्जुने सर, राहुल सुरवसे, आप्पाराव तांदळे, बाळासाहेब शिंदे, नवनाथ शिंदे, उदारकरण पवार आदींचा समावेश होता.
एकूणच, शिक्षकांच्या प्रलंबित प्रश्नांवर झालेल्या या बैठकीमुळे धाराशिव जिल्ह्यातील शिक्षकांमध्ये आशादायक वातावरण निर्माण झाले आहे. आता बैठकीत झालेल्या चर्चेनंतर प्रशासनाकडून प्रत्यक्ष निर्णय आणि कार्यवाही कधी होते, याकडे जिल्ह्यातील शिक्षकांचे लक्ष लागले आहे.
