समन्वय समितीचे निमंत्रक पवन सूर्यवंशी यांचे जिल्ह्यातील सर्व शिक्षकांना सहभागी होण्याचे आवाहन
यशश्री अपडेट्स | धाराशिव
धाराशिव जिल्ह्यात शिक्षण विस्तार अधिकारी पदाच्या पदोन्नती प्रक्रियेत अनियमितता झाल्याचा आरोप करत ती प्रक्रिया तात्काळ रद्द करावी, तसेच शिक्षकांच्या विविध प्रलंबित प्रश्नांवर त्वरित निर्णय घ्यावा, या प्रमुख मागण्यांसाठी जिल्हा प्राथमिक शिक्षक समन्वय समितीच्या वतीने सोमवार, 10 ऑगस्ट रोजी जिल्हा परिषद धाराशिव कार्यालयासमोर धरणे आंदोलन करण्यात येणार आहे. या आंदोलनात जिल्ह्यातील सर्व शिक्षक संघटनांनी मोठ्या संख्येने सहभागी व्हावे, असे आवाहन समितीचे निमंत्रक पवन सूर्यवंशी यांनी केले आहे.
समितीने दिलेल्या माहितीनुसार, जिल्हा परिषद धाराशिवने गेल्या महिन्यात शिक्षण विस्तार अधिकारी, केंद्रप्रमुख आणि मुख्याध्यापक पदांच्या पदोन्नत्या केल्या. मात्र, शिक्षण विस्तार अधिकारी पदाच्या पदोन्नती प्रक्रियेत सेवा ज्येष्ठतेचा विचार करण्यात आला नाही, तसेच पदोन्नतीपूर्वी शिक्षकांनी दाखल केलेल्या आक्षेपांकडे दुर्लक्ष करण्यात आले, असा गंभीर आरोप शिक्षक समन्वय समितीने केला आहे.
समितीच्या मते, संबंधित पदोन्नती प्रक्रिया नियमबाह्य पद्धतीने राबविण्यात आली असून ती पूर्णपणे रद्द करून नव्याने सेवा ज्येष्ठता यादी तयार करावी आणि त्यानंतर पारदर्शक पद्धतीने पदोन्नती प्रक्रिया राबवावी, अशी प्रमुख मागणी करण्यात आली आहे.
आंदोलनातील प्रमुख मागण्या
समन्वय समितीने पदोन्नती प्रक्रियेबरोबरच शिक्षकांच्या इतर अनेक प्रलंबित प्रश्नांकडेही प्रशासनाचे लक्ष वेधले आहे. त्यामध्ये पुढील मागण्यांचा समावेश आहे:
- शिक्षण विस्तार अधिकारी पदोन्नती प्रक्रिया रद्द करून नव्याने ज्येष्ठता यादीच्या आधारे पदोन्नती करावी.
- गेल्या 20 वर्षांपासून प्रलंबित असलेली शिक्षकांची निवड श्रेणी प्रक्रिया तातडीने पूर्ण करावी.
- जिल्हा परिषदेच्या प्राथमिक व माध्यमिक शाळांचे चुकीचे एकत्रीकरण रद्द करून दोन्ही शाळांचे स्वतंत्र अस्तित्व कायम ठेवावे.
- रिक्त असलेली भाषा व गणित/विज्ञान प्राथमिक पदवीधर शिक्षकांची पदे पात्र कार्यरत शिक्षकांमधून भरावीत.
- 1 नोव्हेंबर 2005 पूर्वीच्या जाहिरातीनुसार भरती झालेल्या शिक्षकांना जुनी पेन्शन योजना लागू करावी.
- कोरोना काळात शिक्षकांकडून जमा झालेल्या एक कोटी रुपयांहून अधिक रकमेचा पारदर्शक विनियोग करावा.
- शिक्षकांच्या प्रलंबित पुरवणी देयकांसाठी तातडीने आर्थिक तरतूद करून देयके मंजूर करावीत.
समितीने इशारा दिला आहे की, या मागण्यांवर प्रशासनाने सकारात्मक निर्णय न घेतल्यास शिक्षकांचे आंदोलन अधिक तीव्र करण्यात येईल.
मोठ्या संख्येने सहभागी होण्याचे आवाहन
10 ऑगस्ट रोजी होणाऱ्या धरणे आंदोलनात जिल्ह्यातील सर्व शिक्षकांनी मोठ्या संख्येने सहभागी होऊन आपल्या मागण्यांना बळ द्यावे, असे आवाहन बाळकृष्ण तांबारे, विलास कंठेकुरे, लालासाहेब मगर, पवन सूर्यवंशी, कल्याण बेताळे, बिभीषण पाटील, विक्रम भैया पाटील, संतोष देशपांडे, रमेश बारस्कर, बशीर तांबोळी, प्रशांत माने, किशोर पीसे, अभयकुमार यादव, बळवंत घोगरे, संतोष भोजने, काशिनाथ भालके, विशाल अंधारे यांच्यासह विविध शिक्षक संघटनांच्या प्रतिनिधींनी केले आहे.
जिल्ह्यातील शिक्षकांच्या पदोन्नती, सेवा ज्येष्ठता, निवड श्रेणी, जुनी पेन्शन आणि आर्थिक देयके या प्रश्नांवर हे आंदोलन केंद्रित असल्याने 10 ऑगस्ट रोजी जिल्हा परिषद कार्यालयासमोर शिक्षकांचा मोठा जमाव होण्याची शक्यता व्यक्त केली जात आहे. प्रशासन या मागण्यांवर कोणती भूमिका घेते, याकडे शिक्षकांचे लक्ष लागले आहे.
