यशश्री अपडेट्स | परंडा
धाराशिव जिल्ह्यातील परंडा तालुक्यात यंदा अत्यंत अल्प पाऊस झाल्याने संपूर्ण तालुका भीषण दुष्काळसदृश परिस्थितीचा सामना करत आहे. तालुक्यातील शेती, पिण्याचे पाणी आणि जनावरांच्या चाऱ्याचा प्रश्न गंभीर बनत असताना, चांदणी मध्यम प्रकल्पातील उपयुक्त पाणीसाठा पूर्णपणे संपुष्टात आला असून प्रकल्प सध्या शून्य टक्के (०%) पाणीसाठ्यावर आला आहे. ही परिस्थिती लक्षात घेऊन भाजपा नेते तथा माजी आमदार सुजितसिंह ठाकूर यांनी महाराष्ट्राचे जलसंपदामंत्री राधाकृष्ण विखे पाटील यांना पत्र पाठवून उजणी धरणातून सुरू असलेल्या पाण्याच्या विसर्गाचा उपयोग चांदणी मध्यम प्रकल्प आणि शिराळा उपसा सिंचन योजनेसाठी करण्याची मागणी केली आहे.
परंडा तालुक्यात दुष्काळाचे सावट
परंडा तालुका हा सातत्याने अवर्षणग्रस्त राहिलेला तालुका असून यंदाही पावसाने पाठ फिरवल्याने शेतकऱ्यांपुढे मोठे संकट उभे राहिले आहे. अनेक गावांमध्ये पेरण्या खोळंबल्या असून झालेल्या पेरण्यांनाही पावसाअभावी फटका बसला आहे. चांदणी प्रकल्पाच्या पाणलोट क्षेत्रातही समाधानकारक पाऊस न झाल्याने प्रकल्प पूर्णपणे कोरडा पडला आहे. त्यामुळे आगामी काळात पिण्याच्या पाण्याची तीव्र टंचाई निर्माण होण्याची शक्यता व्यक्त केली जात आहे.
बार्शी शहरावरही पाणीटंचाईचे संकट
चांदणी मध्यम प्रकल्पातून सोलापूर जिल्ह्यातील बार्शी शहराला पिण्याच्या पाण्याचा पुरवठा केला जातो. मात्र, प्रकल्पातील पाणीसाठा संपल्याने बार्शी शहरालाही पाणीटंचाईचे संकट निर्माण होऊ लागले आहे. शहरातील पाणीपुरवठा व्यवस्थेवर त्याचा परिणाम होण्याची शक्यता वाढली असून नागरिकांमध्येही चिंता व्यक्त केली जात आहे.
यापूर्वी उजणीच्या पाण्याने मिळाला होता दिलासा
माजी आमदार सुजितसिंह ठाकूर यांनी पत्रात नमूद केले आहे की, यापूर्वी उजणी धरणाच्या अतिरिक्त पाण्यातून ‘बार्शी उपसा सिंचन योजने’द्वारे चांदणी प्रकल्पात पाणी सोडण्यात आले होते. त्यावेळी चांदणी प्रकल्प भरल्याने बार्शी शहराचा तसेच परिसरातील अनेक गावांचा पाणीप्रश्न मोठ्या प्रमाणात सुटला होता. त्यामुळे सध्याच्या परिस्थितीतही त्याच धर्तीवर तातडीने उपाययोजना करण्याची गरज असल्याचे त्यांनी स्पष्ट केले आहे.
उजणी धरणातून मोठ्या प्रमाणात विसर्ग सुरू
सध्या उजणी धरणाच्या पाणलोट क्षेत्रात चांगला पाऊस झाल्याने धरण पूर्ण क्षमतेने भरले आहे. परिणामी धरणातून नदीपात्रात मोठ्या प्रमाणात पाण्याचा विसर्ग सुरू आहे. हे पाणी वाहून जाण्याऐवजी उपसा सिंचन योजनांद्वारे दुष्काळी भागाकडे वळविल्यास हजारो शेतकरी, ग्रामस्थ आणि बार्शी शहरातील नागरिकांना मोठा दिलासा मिळू शकतो, असा मुद्दा ठाकूर यांनी उपस्थित केला आहे.
चांदणी प्रकल्पात तातडीने पाणी सोडण्याची मागणी
पत्राद्वारे करण्यात आलेल्या मागणीनुसार, उजणी धरणातून सुरू असलेल्या विसर्गाचा वापर करून ‘बार्शी उपसा सिंचन योजने’द्वारे चांदणी मध्यम प्रकल्पात तातडीने पाणी सोडण्यात यावे. याशिवाय ‘शिराळा उपसा सिंचन योजने’च्या माध्यमातून परिसरातील सर्व पाझर तलाव भरून घेण्यात यावेत, जेणेकरून भूजल पातळी वाढण्यास मदत होईल आणि ग्रामीण भागातील पाणीटंचाई कमी होईल.
परंडा तालुका आणि बार्शी शहराला संभाव्य भीषण पाणीटंचाईतून वाचविण्यासाठी जलसंपदा विभागाने तातडीने निर्णय घेणे आवश्यक असल्याचे ठाकूर यांनी पत्रात नमूद केले आहे. संबंधित विभागीय अधिकारी आणि सिंचन यंत्रणेला त्वरित आदेश देऊन पाणी सोडण्याची प्रक्रिया सुरू करावी, अशी अपेक्षाही त्यांनी व्यक्त केली आहे.
दरम्यान, परंडा तालुक्यातील शेतकरी आणि ग्रामस्थांनीही उजणीच्या विसर्गातील पाणी चांदणी प्रकल्पात सोडण्याची मागणी केली असून, शासनाने तातडीने सकारात्मक निर्णय घेतल्यास दुष्काळग्रस्त भागाला मोठा दिलासा मिळेल, अशी भावना व्यक्त केली जात आहे.
