यशश्री अपडेट्स | धाराशिव
धाराशिव जिल्ह्यातील प्रत्येक नागरिकाला गुणवत्तापूर्ण, सुलभ आणि सर्वसमावेशक आरोग्य सेवा उपलब्ध करून देण्यासाठी शासन कटिबद्ध असून आरोग्य क्षेत्रातील आवश्यक सुविधा उभारण्यासाठी निधीची कोणतीही कमतरता पडू दिली जाणार नाही, अशी ग्वाही जिल्ह्याचे पालकमंत्री प्रताप सरनाईक यांनी दिली.
मंगळवार, ४ ऑगस्ट रोजी आयोजित जिल्हास्तरीय एकात्मिक आरोग्यवर्धिनी समितीच्या स्थापना व उद्घाटन कार्यक्रमात ते बोलत होते. यावेळी जिल्हाधिकारी कीर्ती किरण पुजार, जिल्हा परिषदेच्या मुख्य कार्यकारी अधिकारी प्रियंवदा म्हाडदळकर, जिल्हा शल्यचिकित्सक डॉ. धनंजय चाकूरकर, जिल्हा आरोग्य अधिकारी डॉ. सतीश हरिदास, विविध विभागांचे अधिकारी, वैद्यकीय अधिकारी, आरोग्य कर्मचारी आणि समितीचे सदस्य मोठ्या संख्येने उपस्थित होते.
सरनाईक म्हणाले की, जिल्हास्तरीय एकात्मिक आरोग्यवर्धिनी समितीची स्थापना हा केवळ औपचारिक कार्यक्रम नसून जिल्ह्यातील आरोग्य व्यवस्थेला अधिक सक्षम, समन्वयपूर्ण आणि लोकाभिमुख बनविण्याच्या दिशेने टाकलेले महत्त्वपूर्ण पाऊल आहे. शासनाच्या विविध आरोग्य योजनांची प्रभावी अंमलबजावणी, विभागांमधील समन्वय आणि नागरिकांना वेळेत दर्जेदार आरोग्य सेवा उपलब्ध करून देण्यासाठी ही समिती महत्त्वाची भूमिका बजावेल.
केंद्र व राज्य शासनाच्या माध्यमातून आयुष्मान आरोग्य मंदिर, प्राथमिक आरोग्य केंद्रे, ग्रामीण रुग्णालये, उपजिल्हा रुग्णालये, जिल्हा रुग्णालये, महिला रुग्णालये तसेच हिंदुहृदयसम्राट बाळासाहेब ठाकरे आपला दवाखाना यांसारख्या योजनांद्वारे आरोग्य सेवा नागरिकांपर्यंत पोहोचत असल्याचे त्यांनी सांगितले. या सर्व योजनांचा लाभ प्रत्येक पात्र नागरिकापर्यंत प्रभावीपणे पोहोचविण्याची गरज त्यांनी अधोरेखित केली.
समितीच्या प्रमुख जबाबदाऱ्या
पालकमंत्री सरनाईक यांनी समितीच्या कामकाजाबाबत पुढील प्राधान्यक्रम स्पष्ट केले:
- आरोग्य संस्थांमधील सेवा अधिक परिणामकारक करणे
- नागरिकांच्या आरोग्यविषयक तक्रारींचे तातडीने निराकरण करणे
- राष्ट्रीय आरोग्य कार्यक्रमांची प्रभावी अंमलबजावणी
- विविध विभागांतील समन्वय वाढविणे
- लोकसहभागातून आरोग्य व्यवस्था अधिक बळकट करणे
ते पुढे म्हणाले की, वंदनीय बाळासाहेब ठाकरे आपला दवाखाना योजना अधिक प्रभावी करण्यासाठी जिल्ह्यात दवाखान्यांची संख्या वाढविण्यावर भर दिला जाईल. तसेच रुग्णवाहिका आणि शववाहिका सेवा नागरिकांना वेळेत आणि कार्यक्षमतेने उपलब्ध करून देण्यासाठी आवश्यक उपाययोजना करण्यात येतील, असेही त्यांनी स्पष्ट केले.
कार्यक्रमात उपस्थित अधिकाऱ्यांनी जिल्ह्यातील आरोग्य सेवांच्या बळकटीकरणासाठी विविध उपक्रमांची माहिती दिली.
