यशश्री अपडेट्स | कळंब (धाराशिव)
कळंब: तुळजापूर येथील अमली पदार्थांचे जाळे उद्ध्वस्त केल्यानंतर आता धाराशिव जिल्ह्यातील कळंब शहरात ड्रग्जचा मोठा साठा जप्त करण्यात आला आहे. शहरात एमडी (MD) ड्रग्जचा पुरवठा आणि विक्री करणाऱ्या एका टोळीवर धाराशिव पोलिसांच्या स्थानिक गुन्हे शाखेने (LCB) धडक कारवाई केली आहे. या कारवाईत पोलिसांनी २ जणांना रंगेहात पकडले असून त्यांच्याकडून ड्रग्जच्या २९ पुड्या जप्त करण्यात आल्या आहेत. या घटनेमुळे अवैध अमली पदार्थांची विक्री करणाऱ्या तस्करांचे धाबे दणाणले आहेत.
१ लाख १० हजार रुपयांचा मुद्देमाल हस्तगत
स्थानिक गुन्हे शाखेच्या पथकाने सापळा रचून ही कारवाई केली. पोलिसांच्या हाती लागलेल्या मुद्देमालाची माहिती खालीलप्रमाणे:
- एमडी (MD) ड्रग्ज: ११.२१ ग्रॅम वजन असलेल्या २९ पुड्या (किंमत सुमारे ५५,००० रुपये)
- वाहन: गुन्ह्यात वापरलेली एक दुचाकी (किंमत ५५,००० रुपये)
- एकूण मुद्देमाल: १ लाख १० हजार रुपये
अटक करण्यात आलेले आरोपी
१. निखिल युवराज जाधव २. अरविंद दादाराव कांबळे
पोलिसांची धाडसी कारवाई आणि गुन्हा दाखल
मिळालेल्या गुप्त माहितीच्या आधारे धाराशिवच्या पोलीस अधीक्षक रितु खोखर आणि स्थानिक गुन्हे शाखेचे पोलीस निरीक्षक विनोद इज्जपवार यांच्या पथकाने कळंब शहरात सापळा रचला होता. संशयित आरोपी निखिल जाधव आणि अरविंद कांबळे हे ड्रग्जची विक्री करण्यासाठी आले असता पोलिसांनी त्यांना जाळ्यात पकडले.
पोलीस निरीक्षक विनोद इज्जपवार यांनी दिलेल्या तक्रारीवरून कळंब पोलीस ठाण्यात गुन्हा रजिस्टर क्रमांक ३२६/२६ अन्वये अमली पदार्थ विरोधी कायदा (NDPS Act – कलम ८(क), २२(ब)) अंतर्गत गंभीर गुन्हा दाखल करण्यात आला आहे. या प्रकरणाचा सखोल तपास कळंब पोलीस ठाण्याचे पोलीस निरीक्षक शकील शेख करत आहेत.
तुळजापूरनंतर कळंबमधील रॅकेट उद्ध्वस्त; मुख्य सूत्रधाराचा शोध सुरू
काही दिवसांपूर्वीच स्थानिक गुन्हे शाखेने तामलवाडी येथे कारवाई करत तुळजापूर परिसरातील ड्रग्ज रॅकेटचे जाळे उद्ध्वस्त केले होते. त्यानंतर लगेचच कळंब शहरात ही दुसरी मोठी कारवाई करण्यात आली आहे. जिल्ह्यात अमली पदार्थांचे रॅकेट मूळ धरत असल्याचे या कारवाईवरून स्पष्ट होत असून, हे ड्रग्ज नेमके कुठून आणले जात होते आणि यामागे मुख्य सूत्रधार कोण आहे, याचा शोध पोलीस घेत आहेत.
कारवाईत सहभागी झालेले पोलीस पथक
ही धडक कारवाई पोलीस अधीक्षक रितु खोखर, अप्पर पोलीस अधीक्षक सचिन पांडकर आणि उपविभागीय पोलीस अधिकारी संजय पवार यांच्या मार्गदर्शनाखाली पार पडली.
कारवाई करणारे अधिकारी व कर्मचारी:
- स्थानिक गुन्हे शाखा (LCB) धाराशिव: पो.नि. विनोद इज्जपवार, स.पो.नि. खटके, पो.हे.कॉ. राठोड, पो.हे.कॉ. जानराव, पो.हे.कॉ. गादेकर, पो.हे.कॉ. जाधवर, पो.हे.कॉ. चौरे, पो.ना. जाधवर, पो.ना. ढगारे, पो.अं. मुंगळे, चा.पो.हे.कॉ. माने.
- कळंब पोलीस ठाणे: स.पो.नि. मगर, पो.हे.कॉ. शेख, पो.हे.कॉ. माळवे, पो.अं. बोईनवाड, पो.हे.कॉ. आरब.
