यशश्री अपडेट्स | परंडा (प्रतिनिधी): परंडा तालुक्यातील कात्राबाद येथील विद्यार्थिनी कु. संस्कृती समाधान देवकर हिने शैक्षणिक क्षेत्रात नेत्रदीपक यश मिळवत तालुक्याच्या शिरपेचात मानाचा तुरा रोवला आहे. ‘उत्तुंग तेज बाल वैज्ञानिक स्पर्धा परीक्षेच्या’ गट (अ) अंतर्गत (इयत्ता ८वी ते १०वी) गुणवत्ता यादीत संस्कृतीने राज्यात दुसरा क्रमांक पटकावला आहे. तिच्या या घवघवीत यशामुळे तिची थेट ‘इस्त्रो’ आणि ‘आयआयटी’ अभ्यासदौऱ्यासाठी निवड झाली आहे.
थेट ‘इस्रो’ आणि ‘आयआयटी’ ला भेट देण्याची सुवर्णसंधी!
या गुणवत्ता यादीतील यशस्वी विद्यार्थ्यांना देशातील सर्वोच्च विज्ञान आणि तंत्रज्ञान संस्थांना जवळून अनुभवण्याची संधी मिळणार आहे. संस्कृतीला भारतीय अवकाश संशोधन संस्था (ISRO) आणि IIT गांधीनगर यांसारख्या नामांकित संस्थांना भेट देण्यासाठी विनामूल्य अभ्यासदौऱ्यावर नेण्यात येणार आहे. ग्रामीण भागातील एका विद्यार्थिनीला अंतराळ विज्ञान आणि तंत्रज्ञान क्षेत्रातील देशातील सर्वोच्च संस्थांना प्रत्यक्ष भेट देण्याची ही सुवर्णसंधी मिळाल्याने सर्वत्र तिचे कौतुक होत आहे.
प्रतिकूल परिस्थितीवर मात करत मिळवले यश
ग्रामीण भागातील अत्यंत प्रतिकूल परिस्थितीवर मात करत संस्कृतीने मिळवलेले हे यश केवळ कात्राबाद गावासाठीच नव्हे, तर संपूर्ण परंडा तालुक्यासाठी भूषणावह ठरले आहे. तिची ही कामगिरी तालुक्यातील इतर विद्यार्थ्यांसाठी नक्कीच प्रेरणादायी ठरेल, असा विश्वास व्यक्त केला जात आहे.
मान्यवरांच्या हस्ते सत्कार आणि शुभेच्छांचा वर्षाव
कु. संस्कृती देवकर हिच्या या अभूतपूर्व यशाबद्दल आणि इस्त्रो अभ्यासदौऱ्यासाठी निवड झाल्याबद्दल विविध क्षेत्रातील मान्यवरांच्या हस्ते तिचा विशेष सत्कार करण्यात आला.
याप्रसंगी जिल्हा परिषदेचे माजी कृषी व पशुसंवर्धन सभापती दत्ता साळुंके, आण्णासाहेब जाधव, उद्योजक राजाभाऊ शेळके, पै. विशाल देवकर, पंचायत समिती सदस्य तानाजी कोलते, पंचायत समिती सदस्य अमोल नलवडे, कात्राबादचे उपसरपंच गणेश कोकाटे, सिरसावचे सरपंच कुमार वायकुळे, बालाजी नेटके, माऊली गोडगे, परसराम गरड, श्रीमंत गरड, बालाजी कोकाटे, रोहित कोळी, अमोल शेळके, सौदागर नरसाळे आणि कोंडीराम दोलतोडे आदी मान्यवर उपस्थित होते. सर्व मान्यवरांनी संस्कृतीच्या पाठीवर कौतुकाची थाप टाकत तिला पुढील अभ्यासदौऱ्यासाठी व उज्ज्वल भविष्यासाठी मनःपूर्वक शुभेच्छा दिल्या. संस्कृतीच्या या यशामुळे सध्या संपूर्ण परंडा तालुक्यातून तिच्यावर अभिनंदनाचा वर्षाव होत आहे.
