१७ ऑक्टोबरपर्यंत विशेष मोहीम; विविध दाखले, महसूल नोंदींसह महत्त्वाच्या शासकीय सेवा गावपातळीवर उपलब्ध
यशश्री अपडेट्स | धाराशिव प्रतिनिधी :
शासकीय योजना, विविध प्रमाणपत्रे आणि नागरिकांना आवश्यक असलेल्या सेवा अधिक सुलभ पद्धतीने उपलब्ध करून देण्यासाठी धाराशिव जिल्ह्यात ‘सेवा संकल्प अभियान’ राबविण्यात येत आहे. १७ सप्टेंबर ते १७ ऑक्टोबर २०२६ या कालावधीत हे अभियान राबविण्यात येणार असून, विविध शासकीय विभागांच्या समन्वयातून जिल्ह्यात ठिकठिकाणी सेवा शिबिरांचे आयोजन करण्यात येणार आहे. या माध्यमातून पात्र नागरिकांना आवश्यक सेवा आणि विविध योजनांचा लाभ त्यांच्या गावाच्या पातळीवरच मिळवून देण्यावर प्रशासनाचा भर आहे.
पंतप्रधान नरेंद्र मोदी यांच्या संविधानिक पदावरील कारकिर्दीला २५ वर्षे पूर्ण झाल्यानिमित्त शासनाकडून हे अभियान राबविण्यात येत आहे. ‘सेवा परमो धर्मः’ या उक्तीप्रमाणे सामान्य नागरिकांपर्यंत शासकीय सेवा आणि योजनांचा लाभ पोहोचविण्याच्या उद्देशाने या विशेष मोहिमेचे आयोजन करण्यात आले आहे.
नागरिकांना कार्यालयांच्या फेऱ्यांपासून दिलासा
अनेकदा विविध शासकीय दाखले, प्रमाणपत्रे किंवा महसूलविषयक नोंदींसाठी नागरिकांना तालुका व जिल्हास्तरीय कार्यालयांच्या फेऱ्या माराव्या लागतात. ग्रामीण भागातील नागरिकांना यामुळे वेळ आणि आर्थिक खर्चही सहन करावा लागतो. ही अडचण कमी करण्यासाठी सेवा सेतू आणि आपले सरकार सेवा केंद्रांच्या माध्यमातून नागरिकांना त्यांच्या गावातच विविध सेवा उपलब्ध करून देण्याचे नियोजन करण्यात आले आहे.
अभियानाच्या कालावधीत गावपातळीवर सेवा शिबिरे घेण्यात येणार असून, पात्र नागरिकांकडून आवश्यक कागदपत्रांसह अर्ज स्वीकारून संबंधित प्रक्रियेला गती देण्यात येणार आहे. शक्य त्या सेवा शिबिराच्या ठिकाणीच उपलब्ध करून देण्याचे नियोजन करण्यात आले आहे.
महसूल विभागातील प्रलंबित कामांना गती
या अभियानात महसूल विभागाशी संबंधित विविध प्रकरणांच्या निपटाऱ्यावर विशेष लक्ष केंद्रित करण्यात येणार आहे. त्यामध्ये प्रलंबित फेरफार नोंदींचा निपटारा, ‘जिवंत सातबारा’ मोहीम, ७/१२ व ८-अ उताऱ्यांमधील नोंदी अद्ययावत करणे यांचा समावेश आहे.
तसेच गावठाणातील नागरिकांना स्वामित्व सनद वाटप करण्याची प्रक्रिया राबविण्यात येणार आहे. जमिनीच्या खरेदी-विक्री व्यवहारांमध्ये आवश्यक असलेल्या जमिनीच्या मोजणीशी संबंधित प्रकरणांनाही या अभियानाच्या माध्यमातून गती देण्याचे नियोजन करण्यात आले आहे.
गावपातळीवर मिळणार विविध प्रमाणपत्रे
ग्रामीण भागातील नागरिकांना वारंवार शासकीय कार्यालयात जावे लागू नये, यासाठी विविध प्रकारची प्रमाणपत्रे आणि नोंदणी सेवा उपलब्ध करून दिली जाणार आहे.
यामध्ये—
- रहिवासी प्रमाणपत्र
- नॉन-क्रिमिलेअर प्रमाणपत्र
- आर्थिक मागास प्रमाणपत्र
- महिला शेतकरी प्रमाणपत्र
- दिव्यांग प्रमाणपत्र
- विवाह नोंदणी
- जन्म प्रमाणपत्र
- मृत्यू प्रमाणपत्र
- आधार कार्डसंबंधी सेवा
यांसह नागरिकांच्या गरजेनुसार विविध शासकीय सेवांचा समावेश करण्यात आला आहे.
जिल्हाधिकाऱ्यांच्या अध्यक्षतेखाली नियोजन बैठक
अभियानाची प्रभावी आणि नियोजनबद्ध अंमलबजावणी करण्यासाठी जिल्हाधिकारी कीर्ती किरण पुजार यांच्या अध्यक्षतेखाली २१ सप्टेंबर २०२६ रोजी सर्व संबंधित जिल्हास्तरीय व तालुकास्तरीय शासकीय यंत्रणांची व्हिडिओ कॉन्फरन्सद्वारे बैठक घेण्यात आली.
या बैठकीत अभियानाच्या अंमलबजावणीबाबत सविस्तर आढावा घेण्यात आला. जिल्ह्यातील जास्तीत जास्त पात्र लाभार्थ्यांपर्यंत शासकीय योजना आणि सेवा पोहोचाव्यात, यासाठी विभागनिहाय नियोजन करण्याच्या सूचना देण्यात आल्या. तसेच सेवा शिबिरांच्या आयोजनासाठी आवश्यक पूर्वतयारी पूर्ण करून नागरिकांना कोणतीही अडचण होणार नाही, याची दक्षता घेण्याचे निर्देश संबंधित यंत्रणांना देण्यात आले.
गावोगावी शिबिरांचे आयोजन
‘सेवा संकल्प अभियान’ अधिक व्यापक करण्यासाठी जिल्ह्यातील विविध कार्यालयांच्या पुढाकाराने तालुका आणि गावपातळीवर जास्तीत जास्त कार्यक्रम आयोजित करण्यात येणार आहेत. विविध विभागांनी आपापल्या कार्यक्षेत्रातील पात्र लाभार्थ्यांची माहिती संकलित करून त्यांना आवश्यक सेवांचा लाभ मिळवून देण्यासाठी समन्वय साधण्याचे नियोजन केले आहे.
सेवा केंद्रे, महसूल विभाग, ग्रामपंचायत आणि संबंधित शासकीय यंत्रणांच्या समन्वयातून नागरिकांच्या अर्जांची प्रक्रिया पूर्ण करण्यावर भर देण्यात येणार आहे. त्यामुळे नागरिकांना आवश्यक कागदपत्रे घेऊन संबंधित सेवा शिबिरात उपस्थित राहता येणार आहे.
नागरिकांनी आवश्यक कागदपत्रांसह सहभागी व्हावे
‘सेवा संकल्प अभियानाचा’ लाभ अधिकाधिक नागरिकांना मिळावा, यासाठी जिल्ह्यात आणि तालुक्यांमध्ये व्यापक जनजागृती करण्यात येणार आहे. नागरिकांनी आपल्या गावात किंवा परिसरात आयोजित करण्यात येणाऱ्या सेवा शिबिरांची माहिती घेऊन आवश्यक कागदपत्रांसह शिबिरात उपस्थित राहावे, असे आवाहन जिल्हाधिकारी कीर्ती किरण पुजार यांनी केले आहे.
या अभियानामुळे महसूल नोंदी अद्ययावत करण्यापासून विविध प्रमाणपत्रे, नोंदणी आणि इतर शासकीय सेवांपर्यंत अनेक कामांना स्थानिक पातळीवर गती मिळण्याची अपेक्षा आहे. शासकीय सेवा नागरिकांच्या दारी पोहोचविण्याच्या उद्देशाने राबविण्यात येत असलेल्या या अभियानाचा नागरिकांनी मोठ्या प्रमाणात लाभ घ्यावा, असे प्रशासनाकडून सांगण्यात आले आहे.
