यशश्री अपडेट्स | धाराशिव
धाराशिव शहरासह जिल्ह्याच्या विविध भागांतून मोटारसायकली चोरी करणाऱ्या एका संशयिताला स्थानिक गुन्हे शाखेच्या पथकाने ताब्यात घेतले आहे. संशयिताकडून चोरीच्या तब्बल चार मोटारसायकली जप्त करण्यात आल्या असून, जप्त करण्यात आलेल्या वाहनांची एकूण किंमत सुमारे १ लाख ८५ हजार रुपये आहे. या कारवाईमुळे दुचाकी चोरीच्या काही गुन्ह्यांचा उलगडा झाला आहे.
पोलीस अधीक्षक रितु खोखर आणि अपर पोलीस अधीक्षक सचिन पांडकर यांच्या आदेशानुसार स्थानिक गुन्हे शाखेचे पथक जिल्ह्यातील अभिलेखावरील गुन्हे उघडकीस आणण्यासाठी तसेच चोरीच्या वाहनांचा शोध घेण्यासाठी पेट्रोलिंग करत होते. २४ ऑगस्ट रोजी सहाय्यक पोलीस निरीक्षक अमोल मोरे यांच्या नेतृत्वाखाली पथक धाराशिव शहर परिसरात गस्त घालत असताना अण्णाभाऊ साठे चौक परिसरात एक व्यक्ती चोरीची मोटारसायकल बाळगून असल्याची गोपनीय माहिती पोलिसांना मिळाली.
मिळालेल्या माहितीच्या आधारे पोलिसांनी अण्णाभाऊ साठे चौक परिसरात सापळा रचून परमेश्वर उर्फ सुरेश चंदर काळे (वय ४०, रा. जुना बस डेपो जवळ, पारधी पिढी, धाराशिव) याला ताब्यात घेतले. त्याच्याकडे मोटारसायकलीबाबत चौकशी केली असता सुरुवातीला त्याने पोलिसांना उडवाउडवीची उत्तरे देण्याचा प्रयत्न केला. मात्र, पोलिसांनी अधिक कसून चौकशी केल्यानंतर त्याने चोरीच्या मोटारसायकली वेगवेगळ्या ठिकाणी लपवून ठेवल्याची माहिती दिली.
संशयिताने दिलेल्या माहितीनुसार स्थानिक गुन्हे शाखेच्या पथकाने संबंधित ठिकाणी जाऊन शोधमोहीम राबविली. या शोधादरम्यान चार मोटारसायकली पोलिसांच्या हाती लागल्या. जप्त करण्यात आलेल्या वाहनांची गुन्हे अभिलेखाच्या आधारे पडताळणी केली असता या मोटारसायकली विविध पोलीस ठाण्यांच्या हद्दीतून चोरीस गेल्याचे निष्पन्न झाले.
यामध्ये आनंदनगर पोलीस ठाणे, धाराशिव ग्रामीण पोलीस ठाणे तसेच धाराशिव जिल्ह्याबाहेरील औसा आणि कर्जत पोलीस ठाण्याच्या हद्दीतून चोरीस गेलेल्या मोटारसायकलींचा समावेश असल्याचे पोलिसांच्या तपासात समोर आले आहे.
या कारवाईत पोलिसांनी संशयित परमेश्वर उर्फ सुरेश काळे याच्यासह चोरीच्या चारही मोटारसायकली ताब्यात घेतल्या आहेत. जप्त केलेल्या वाहनांची एकूण किंमत अंदाजे १ लाख ८५ हजार रुपये आहे. या कारवाईमुळे दुचाकी चोरीच्या आणखी काही घटनांचा तपास पुढे लागण्याची शक्यता असून, संशयिताने आणखी कोणत्या ठिकाणी वाहन चोरी केली आहे का, याबाबत पोलिसांकडून तपास सुरू आहे.
ताब्यात घेण्यात आलेल्या संशयितासह जप्त केलेल्या चारही मोटारसायकली पुढील कायदेशीर कारवाईसाठी आनंदनगर पोलीस ठाण्यात हजर करण्यात आल्या आहेत. या प्रकरणाच्या पुढील तपासात आणखी काही चोरीच्या वाहनांचा किंवा गुन्ह्यांचा उलगडा होण्याची शक्यता पोलिसांनी तपासाच्या अनुषंगाने व्यक्त केली आहे.
ही कारवाई पोलीस अधीक्षक रितु खोखर, अपर पोलीस अधीक्षक सचिन पांडकर यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार, सहाय्यक पोलीस निरीक्षक अमोल मोरे यांच्या नेतृत्वाखाली पोलीस हवालदार समाधान वाघमारे, राहुल नाईकवाडी, बळीराम शिंदे, अमोल चव्हाण, महिला पोलीस हवालदार शोभा बांगर, तसेच प्रकाश, चापोका दहिहांडे आणि शेरखाने यांच्या पथकाने केली.
दुचाकी चोरीच्या घटनांवर नियंत्रण मिळवण्यासाठी स्थानिक गुन्हे शाखेच्या या कारवाईमुळे चोरीच्या वाहनांचा माग काढण्यास पोलिसांना महत्त्वाचे यश मिळाले आहे.
