तुळजाभवानी देवीच्या दर्शनासाठी आलेल्या वृद्ध महिलेला बनावट सोन्याच्या बिस्किटाचा आमिष दाखवून सोन्याचे दागिने लंपास केल्याची घटना; स्थानिक गुन्हे शाखेची कारवाई
यशश्री अपडेट्स | धाराशिव : तुळजाभवानी देवीच्या दर्शनासाठी आलेल्या एका वृद्ध महिलेला खोट्या सोन्याचे बिस्कीट देऊन तिच्या विश्वासाचा गैरफायदा घेत सोन्याचे दागिने लंपास करणाऱ्या आरोपीला धाराशिव स्थानिक गुन्हे शाखेच्या पथकाने जेरबंद केले आहे. या कारवाईत पोलिसांनी आरोपीकडून चोरीचे सोन्याचे दागिने तसेच गुन्ह्यात वापरलेले वाहन असा एकूण ४ लाख ६५ हजार रुपयांचा मुद्देमाल जप्त केला आहे.
या प्रकरणी ऋषीकेश बंडू जाधव (रा. बीड) याला पोलिसांनी ताब्यात घेतले आहे. तुळजापूर येथे तुळजाभवानी देवीच्या दर्शनासाठी आलेल्या वृद्ध महिलेला आरोपीने खोट्या सोन्याच्या बिस्किटाचे आमिष दाखवत फसवणूक केल्याचे तपासात समोर आले आहे. त्यानंतर महिलेच्या अंगावरील मौल्यवान सोन्याचे दागिने लंपास करून आरोपीने तेथून पलायन केले होते.
या घटनेनंतर संबंधित वृद्ध महिलेने तुळजापूर पोलीस ठाण्यात तक्रार दिली होती. त्यानुसार अज्ञात आरोपीविरुद्ध गुन्हा दाखल करण्यात आला होता. प्रकरणाचे गांभीर्य लक्षात घेऊन धाराशिव स्थानिक गुन्हे शाखेने तपास सुरू केला.
गोपनीय माहितीच्या आधारे आरोपीच्या मुसक्या आवळल्या
तपासादरम्यान स्थानिक गुन्हे शाखेच्या पथकाला आरोपीबाबत गोपनीय माहिती मिळाली. या माहितीच्या आधारे पोलिसांनी सापळा रचून ऋषीकेश जाधव याला ताब्यात घेतले. चौकशीदरम्यान त्याने गुन्ह्याची माहिती दिल्याचे पोलिस सूत्रांनी सांगितले.
पोलिसांनी आरोपीकडून चोरीस गेलेले सोन्याचे दागिने आणि गुन्हा करताना वापरण्यात आलेले वाहन जप्त केले आहे. जप्त करण्यात आलेल्या मुद्देमालाची एकूण किंमत ४ लाख ६५ हजार रुपये असल्याची माहिती देण्यात आली आहे.
अन्य साथीदारांचाही शोध सुरू
पोलिसांच्या चौकशीत आरोपीने या गुन्ह्यातील अन्य काही साथीदारांची नावे सांगितल्याची माहिती समोर आली आहे. त्यामुळे या प्रकरणाचा तपास अधिक व्यापक करण्यात आला असून, संबंधित साथीदारांचा शोध घेण्यासाठी पोलीस प्रयत्न करीत आहेत.
धार्मिक स्थळी दर्शनासाठी येणाऱ्या भाविकांना लक्ष्य करून फसवणूक करणाऱ्या टोळ्यांविरोधात पोलिसांनी कारवाईचा बडगा उगारला असून, नागरिकांनी अनोळखी व्यक्तींकडून मिळणाऱ्या सोन्याच्या वस्तू अथवा अन्य आकर्षक आमिषांपासून सावध राहावे, असे आवाहन करण्यात येत आहे.
या कारवाईमुळे तुळजापूर परिसरात अशा प्रकारच्या फसवणुकीच्या घटनांना आळा बसण्यास मदत होणार असून, स्थानिक गुन्हे शाखेच्या कारवाईचे सर्वत्र कौतुक होत आहे. या प्रकरणात पुढील तपास तुळजापूर पोलीस करीत आहेत.
