यशश्री अपडेट्स | धाराशिव
रुईभर, ता. धाराशिव येथील रहिवासी तथा भारतीय जनता पक्षाचे निष्ठावंत कार्यकर्ते रामदास कोळगे यांची भारतीय जनता पार्टी किसान मोर्चाच्या महाराष्ट्र प्रदेश चिटणीसपदी नियुक्ती करण्यात आली आहे. प्रदेश पातळीवर महत्त्वाची जबाबदारी मिळाल्याने धाराशिव जिल्ह्यातील भाजप कार्यकर्त्यांमध्ये उत्साहाचे वातावरण निर्माण झाले असून, विविध स्तरातून कोळगे यांच्यावर अभिनंदनाचा वर्षाव होत आहे.
भाजप जिल्हाध्यक्ष दत्ताभाऊ कुलकर्णी यांनी रामदास कोळगे यांच्या नियुक्तीबद्दल त्यांचे अभिनंदन करून आगामी वाटचालीस शुभेच्छा दिल्या. संघटनात्मक कामाचा प्रदीर्घ अनुभव, पक्षाशी असलेली निष्ठा आणि कार्यकर्त्यांशी असलेला सातत्यपूर्ण संपर्क यामुळे कोळगे यांच्यावर प्रदेश पातळीवरील ही जबाबदारी सोपविण्यात आल्याचे मानले जात आहे.
रामदास कोळगे यांनी यापूर्वी भारतीय जनता युवा मोर्चाचे जिल्हाआध्यक्ष, धाराशिव पंचायत समितीचे मा. उपसभापती,जिल्हा परिषदेचे मा. सदस्य,भाजपाचे मा. जिल्हा सरचिटणीस आश्या जबाबदारी सांभाळल्या आहेत या काळात त्यांनी पक्षाच्या संघटनात्मक विस्तारासाठी तसेच युवकांना पक्षाच्या विचारधारेसोबत जोडण्यासाठी काम केले. ग्रामीण भागातील कार्यकर्त्यांशी असलेला त्यांचा सातत्यपूर्ण संपर्क आणि संघटनात्मक कामाचा अनुभव ही त्यांच्या राजकीय वाटचालीतील महत्त्वाची बाजू मानली जाते.
शेतकरी प्रश्नांसाठी काम करण्याची मोठी जबाबदारी
किसान मोर्चाच्या माध्यमातून शेतकरी, शेती आणि ग्रामीण भागाशी संबंधित विविध प्रश्नांवर काम करण्याची मोठी जबाबदारी आता रामदास कोळगे यांच्यावर आली आहे. शेतीमालाला योग्य बाजारभाव, शेतकऱ्यांच्या विविध योजना, सिंचन, पीक विमा, कृषीविषयक सुविधा, ग्रामीण भागातील पायाभूत सुविधा तसेच केंद्र व राज्य सरकारच्या शेतकरी कल्याणकारी योजनांचा लाभ तळागाळातील शेतकऱ्यांपर्यंत पोहोचविण्यासाठी संघटनात्मक पातळीवर काम करण्याचे आव्हान त्यांच्यासमोर असेल.
प्रदेश कार्यकारिणीत मिळालेल्या या महत्त्वपूर्ण स्थानामुळे धाराशिव जिल्ह्यातील भाजप संघटनेलाही प्रदेश पातळीवर प्रतिनिधित्व मिळाले आहे. त्यामुळे जिल्ह्यातील पक्षाच्या कार्यकर्त्यांमध्ये समाधान व्यक्त होत आहे.
पक्षनिष्ठ कार्यकर्त्याला प्रदेश पातळीवर संधी
धाराशिव जिल्ह्यात भाजपच्या संघटनात्मक वाटचालीत जुने आणि नवे कार्यकर्ते, नेतृत्व आणि पक्षसंघटन याबाबत विविध चर्चा सुरू असताना रामदास कोळगे यांची प्रदेश पातळीवरील नियुक्ती राजकीयदृष्ट्याही महत्त्वाची मानली जात आहे. कोळगे यांना मिळालेली प्रदेश पातळीवरील जबाबदारी कार्यकर्त्यांसाठी उत्साहवर्धक ठरत आहे.
निष्ठावंत आणि संघटनात्मक कामाचा अनुभव असलेल्या कार्यकर्त्याला प्रदेश पातळीवर जबाबदारी मिळाल्याने भाजपमधील कार्यकर्त्यांमध्ये आनंदाचे वातावरण असल्याचे बोलले जात आहे. आगामी काळात किसान मोर्चाच्या माध्यमातून धाराशिवसह महाराष्ट्रातील शेतकरी आणि ग्रामीण भागातील प्रश्नांना प्रभावीपणे मांडण्याची अपेक्षा कार्यकर्त्यांकडून व्यक्त होत आहे.
किसान मोर्चाला नवी दिशा देण्याचा विश्वास
रामदास कोळगे यांच्या नियुक्तीबद्दल कार्यकर्त्यांकडून शुभेच्छा देताना, शेतकरी आणि ग्रामीण विकासाच्या प्रश्नांची जाण असलेल्या कार्यकर्त्याला मिळालेली ही जबाबदारी अभिमानास्पद असल्याची भावना व्यक्त करण्यात आली. त्यांच्या नेतृत्वातून किसान मोर्चाच्या संघटनात्मक कार्याला अधिक बळ मिळेल आणि शेतकरी हिताच्या विविध प्रश्नांना प्रदेश पातळीवर प्रभावी व्यासपीठ मिळेल, असा विश्वास कार्यकर्त्यांनी व्यक्त केला.
शेतकरी, शेती आणि ग्रामीण विकासाच्या प्रश्नांसाठी अधिक जोमाने काम करण्याची संधी मिळाल्याने रामदास कोळगे यांच्या पुढील राजकीय व संघटनात्मक वाटचालीकडे आता धाराशिव जिल्ह्यासह भाजप कार्यकर्त्यांचे लक्ष लागले आहे.
