यशश्री अपडेट्स | तुळजापूर
तुळजापूर शहरातील शिक्षक कॉलनी परिसरात 15 वर्षीय अल्पवयीन मुलीवर लैंगिक अत्याचार झाल्याचा गंभीर प्रकार समोर आला आहे. या प्रकरणी तुळजापूर पोलिस ठाण्यात एका तरुणाविरुद्ध भारतीय न्याय संहिता (BNS) तसेच बालकांचे लैंगिक अपराधांपासून संरक्षण अधिनियम (POCSO) अंतर्गत गुन्हा दाखल करण्यात आला असून पोलिसांनी तपास सुरू केला आहे.
पोलिसांकडून मिळालेल्या माहितीनुसार, पीडित मुलगी आणि आरोपी एकाच परिसरात राहत असल्याने त्यांची पूर्वीपासून ओळख होती. आरोपी रेहान अस्लम शेख याने काम असल्याचे कारण सांगून अल्पवयीन मुलीला आपल्या घरी बोलावल्याचा आरोप आहे. त्यानंतर तिच्यावर जबरदस्तीने लैंगिक अत्याचार करण्यात आल्याचे तक्रारीत नमूद करण्यात आले आहे.
तक्रारीनुसार, या घटनेनंतर संबंधित तरुणाने पीडितेला कोणालाही हा प्रकार सांगितल्यास तिच्या आई-वडिलांना मारहाण करण्याची धमकी दिली. तसेच तिचे फोटो आणि व्हिडिओ व्हायरल करण्याची धमकी देऊन तिला मानसिक दबावाखाली ठेवण्याचा प्रयत्न केल्याचाही आरोप करण्यात आला आहे.
काही दिवसांनंतर पीडित मुलीने घडलेला संपूर्ण प्रकार आपल्या आई-वडिलांना सांगितला. त्यानंतर कुटुंबीयांनी तातडीने तुळजापूर पोलिस ठाण्यात धाव घेत आरोपीविरुद्ध तक्रार दाखल केली. तक्रारीच्या आधारे पोलिसांनी आरोपीविरुद्ध भारतीय न्याय संहिता (BNS) कलम 65(1), 78, 351(2), 351(3) तसेच POCSO कायद्यातील कलम 4 आणि 12 अंतर्गत गुन्हा नोंदविला आहे.
या प्रकरणाचा पुढील तपास पोलिस उपनिरीक्षक अन्नपूर्णा शामराव मस्के यांच्याकडे सोपविण्यात आला आहे. पोलिसांकडून पीडितेचा जबाब नोंदविणे, वैद्यकीय तपासणी, डिजिटल पुराव्यांची पडताळणी तसेच आरोपीच्या हालचालींची चौकशी केली जात असल्याची माहिती मिळाली आहे.
दरम्यान, अल्पवयीन मुलांवरील लैंगिक अत्याचाराच्या घटनांमध्ये POCSO कायद्यानुसार कठोर कारवाईची तरतूद असून या प्रकरणाकडे तुळजापूर परिसरात गांभीर्याने पाहिले जात आहे. पोलिसांनी नागरिकांना अशा प्रकारच्या घटनांची माहिती तातडीने पोलिसांना देण्याचे आवाहन केले आहे.
