यशश्री अपडेट्स | धाराशिव
मराठवाडा पदवीधर मतदारसंघाच्या निवडणुकीत ऐतिहासिक विजय मिळवल्यानंतर नवनिर्वाचित आमदार डॉ. प्रतापसिंह वेदप्रकाश राजकीय वर्तुळात भेटीची चर्चा\nमराठवाडापाटील यांनी राज्याच्या राजकारणातील ज्येष्ठ नेते तथा राष्ट्रवादी काँग्रेस पक्षाचे (शरदचंद्र पवार) अध्यक्ष खा. शरदचंद्र पवार यांची मुंबईतील निवासस्थानी ‘सिल्वर ओक’ येथे सदिच्छा भेट घेतली. यावेळी त्यांनी शरद पवार यांचे आशीर्वाद घेतले. या भेटीतून आगामी काळात पदवीधरांचे प्रश्न, युवकांचे प्रश्न आणि मराठवाड्याच्या विकासाच्या मुद्द्यांवर काम करण्यासाठी त्यांना ज्येष्ठ नेतृत्वाचे मार्गदर्शन मिळाले.
या भेटीप्रसंगी राष्ट्रवादी काँग्रेस पक्षाचे प्रवक्ते मेहबूब शेख तसेच माजी खासदार वंदना चव्हाण उपस्थित होत्या. निवडणुकीतील विजयाबद्दल डॉ. प्रतापसिंह पाटील यांचे अभिनंदन करत शरद पवार यांनी त्यांना पुढील राजकीय आणि सामाजिक वाटचालीसाठी शुभेच्छा दिल्या.
पदवीधरांच्या प्रश्नांना प्राधान्य द्या; शरद पवारांचा कानमंत्र!
भेटीदरम्यान शरद पवार यांनी मराठवाडा पदवीधर मतदारसंघातील मतदारांच्या अपेक्षा आणि जबाबदाऱ्यांची जाणीव करून देत पदवीधरांच्या प्रश्नांसाठी सातत्याने काम करण्याचा महत्त्वपूर्ण सल्ला दिला. निवडणुकीत मिळालेला जनतेचा विश्वास हा केवळ विजय नसून मोठी जबाबदारी असल्याचे अधोरेखित करत पदवीधर बांधवांच्या अडचणी समजून घेऊन त्या सोडविण्यासाठी अहोरात्र प्रयत्न करण्याचे मार्गदर्शन त्यांनी केले.
विशेषतः सुशिक्षित बेरोजगारांचे प्रश्न, युवकांना रोजगाराच्या संधी, स्पर्धा परीक्षांची तयारी करणाऱ्या विद्यार्थ्यांच्या अडचणी, शिक्षण क्षेत्रातील समस्या, शैक्षणिक सुविधा आणि पदवीधरांच्या न्याय्य हक्कांसाठी प्रभावीपणे आवाज उठविण्याची आवश्यकता या विषयांवर त्यांनी मार्गदर्शन केले. पदवीधरांचे प्रश्न केवळ निवडणुकीपुरते मर्यादित न ठेवता त्यांचा सातत्याने पाठपुरावा करणे आवश्यक असल्याचा संदेश या भेटीतून मिळाला.
पदवीधरांचा आवाज सभागृहात बुलंद करणार!
यावेळी आमदार डॉ. प्रतापसिंह पाटील यांनी मिळालेल्या संधीचा उपयोग मराठवाड्यातील पदवीधरांचे प्रलंबित प्रश्न सोडविण्यासाठी करणार असल्याचा विश्वास व्यक्त केला. मतदारांनी दाखविलेला विश्वास सार्थ ठरविण्यासाठी आपण कटिबद्ध असून शिक्षण, रोजगार, स्पर्धा परीक्षा, युवकांचे भविष्य आणि पदवीधरांच्या विविध प्रश्नांवर प्रामाणिकपणे काम करणार असल्याचे त्यांनी सांगितले.
विधानपरिषदेत पदवीधरांचे प्रश्न प्रभावीपणे मांडून त्यांना न्याय मिळवून देण्यासाठी शासनदरबारी सातत्याने पाठपुरावा केला जाईल. ग्रामीण भागातील तसेच शहरी भागातील पदवीधरांना भेडसावणाऱ्या अडचणी जाणून घेऊन त्यांच्या प्रश्नांना प्राधान्य देण्यात येईल, असा निर्धारही त्यांनी व्यक्त केला.
शरद पवारांच्या विचारांचा वारसा पुढे नेण्याचा निर्धार!
शरद पवार यांचे पुरोगामी विचार, सर्वसमावेशक विकासाची भूमिका, सामाजिक बांधिलकी आणि लोकसेवेचा वारसा पुढे नेण्यासाठी आपण प्रयत्नशील राहणार असल्याचे डॉ. पाटील यांनी नमूद केले.
यावेळी भावना व्यक्त करताना ते म्हणाले, “साहेबांचे मार्गदर्शन, आशीर्वाद आणि विश्वास हीच माझी ऊर्जा आहे. पदवीधर बांधवांनी माझ्यावर जो विश्वास दाखविला आहे, त्या विश्वासाला तडा जाऊ देणार नाही. त्यांच्या प्रश्नांसाठी सातत्याने संघर्ष करून त्यांना न्याय मिळवून देणे हेच माझे प्रमुख ध्येय आहे.”
राजकीय वर्तुळात भेटीची चर्चा
मराठवाडा पदवीधर मतदारसंघातून विजय मिळवल्यानंतर डॉ. प्रतापसिंह पाटील यांनी शरद पवार यांची घेतलेली ही भेट राजकीय आणि सामाजिकदृष्ट्याही महत्त्वाची मानली जात आहे. आगामी काळात पदवीधरांचे प्रश्न, युवकांचे प्रश्न आणि मराठवाड्याच्या विकासाच्या मुद्द्यांवर त्यांची भूमिका काय असेल, याकडे सर्वांचे लक्ष लागले आहे.
एकीकडे निवडणुकीतील विजयाचा आनंद, तर दुसरीकडे पदवीधरांच्या अपेक्षा पूर्ण करण्याची मोठी जबाबदारी अशा पार्श्वभूमीवर झालेल्या या भेटीतून डॉ. प्रतापसिंह पाटील यांच्या पुढील वाटचालीला ज्येष्ठ नेते शरद पवार यांचे मार्गदर्शन आणि आशीर्वाद मिळाल्याचे चित्र स्पष्ट झाले आहे.
पदवीधरांचा विश्वास, ज्येष्ठ नेतृत्वाचे मार्गदर्शन आणि प्रश्न सोडविण्याचा निर्धार; आता डॉ. प्रतापसिंह पाटील यांच्या कामगिरीकडे मराठवाड्यातील पदवीधरांचे लक्ष!
