यशश्री अपडेट्स | अंतरवाली सराटी
मराठा आरक्षणाच्या मागणीसाठी संघर्षयोद्धा मनोज जरांगे पाटील यांच्या आमरण उपोषणाचा आज सहावा दिवस असून, त्यांच्या आंदोलनाला पाठिंबा देण्यासाठी अंतरवाली सराटी येथे महाराष्ट्रभरातून मराठा बांधव मोठ्या संख्येने दाखल झाले आहेत. उपोषणस्थळी वाढलेल्या गर्दीमुळे परिसरात अक्षरशः पाय ठेवायलाही जागा उरली नसल्याचे चित्र पाहायला मिळत आहे.
मराठवाडा बंदला उत्स्फूर्त प्रतिसाद
जरांगे पाटील यांच्या आंदोलनाला पाठिंबा देण्यासाठी आज मराठवाडा बंदची हाक देण्यात आली आहे. मराठवाड्यातील विविध जिल्ह्यांमध्ये व्यापारी, नागरिक आणि मराठा समाजबांधवांकडून बंदला प्रतिसाद देण्यात येत असल्याचे चित्र आहे. अनेक ठिकाणी दुकाने बंद ठेवून आंदोलनाला पाठिंबा व्यक्त केला जात आहे.
अंतरवाली सराटीत जनसागर
दरम्यान, अंतरवाली सराटी येथील उपोषणस्थळी आज मोठ्या प्रमाणात गर्दी झाली आहे. विविध भागांतून आलेले मराठा बांधव आंदोलनस्थळी एकत्रित होत असून, परिसरात घोषणाबाजी सुरू आहे. गर्दी वाढत असल्याने प्रशासन आणि पोलिसांकडून वाहतूक तसेच गर्दी नियंत्रणाचे नियोजन करण्यात येत आहे.
उपोषणाचा सहावा दिवस; सरकारच्या भूमिकेकडे लक्ष
मनोज जरांगे पाटील यांच्या उपोषणाचा आज सहावा दिवस असल्याने आंदोलनाची तीव्रता वाढताना दिसत आहे. मराठा आरक्षणासह विविध मागण्यांसाठी सुरू असलेल्या या आंदोलनावर सरकारकडून काय भूमिका घेतली जाते, याकडे आंदोलकांसह संपूर्ण महाराष्ट्राचे लक्ष लागले आहे.
मराठवाडा बंद आणि अंतरवाली सराटीतील वाढती गर्दी यामुळे मराठा आरक्षणाच्या आंदोलनाला पुन्हा एकदा मोठे जनसमर्थन मिळत असल्याचे चित्र निर्माण झाले आहे.
