🔴 स्थानिक गुन्हे शाखेची धडक कारवाई; पिस्टलसह दोन जिवंत काडतुसे जप्त

यशश्री अपडेट्स | धाराशिव प्रतिनिधी
कळंब तालुक्यातील आंदोरा येथे होणाऱ्या जात पंचायतीसाठी जात असताना पिस्टल आणि दोन जिवंत काडतुसे बाळगणाऱ्या एका तरुणाला स्थानिक गुन्हे शाखेच्या पथकाने ताब्यात घेतले आहे. शुक्रवारी आंदोरा गावाजवळील एका ढाब्यासमोर ही कारवाई करण्यात आली. आरोपीविरुद्ध कळंब पोलीस ठाण्यात अवैधरित्या शस्त्र बाळगल्याप्रकरणी गुन्हा दाखल करण्यात आला आहे.
पोलीस अधीक्षक रितू खोखर, अपर पोलीस अधीक्षक सचिन पांडकर आणि स्थानिक गुन्हे शाखेचे पोलीस निरीक्षक विनोद इज्जपवार यांच्या मार्गदर्शनाखाली सहायक पोलीस निरीक्षक सचिन खटके यांच्या पथकाने ही कारवाई केली. गुन्हे शाखेचे पथक शुक्रवारी गुन्हेगारांची माहिती संकलित करण्यासाठी गस्त घालत असताना येरमाळा चौक परिसरात एका खबऱ्याकडून माहिती मिळाली.
माहितीनुसार, आंदोरा येथे होणाऱ्या जात पंचायतीस उपस्थित राहण्यासाठी आलेल्या एका व्यक्तीकडे पिस्टल असल्याची खबर मिळताच पोलिसांनी तातडीने घटनास्थळी धाव घेतली. आंदोरा गावाजवळील ढाब्यासमोर संशयित व्यक्ती दिसून आली. पोलिसांचे पथक पाहताच त्याने संशयास्पद हालचाली सुरू केल्या. तो पळून जाण्याच्या तयारीत असतानाच पोलिसांनी त्याला शिताफीने पकडले.
चौकशीदरम्यान तो भूम शहरातील झगडे गल्ली परिसरातील रहिवासी असल्याचे समोर आले. त्याची झडती घेतली असता कमरेला अडकवलेली एक पिस्टल आणि पँटच्या खिशात ठेवलेली दोन जिवंत काडतुसे आढळून आली. जप्त करण्यात आलेल्या मुद्देमालाची किंमत सुमारे ४६ हजार रुपये असल्याचे पोलिसांनी सांगितले.
आरोपीची वैद्यकीय तपासणी करून त्याच्याविरुद्ध भारतीय हत्यार कायद्यानुसार गुन्हा दाखल करण्यात आला आहे.

संभाव्य अनर्थ टळला?

आंदोरा येथे आयोजित जात पंचायतीस आरोपी पिस्टल घेऊन का आला होता? त्यामागे नेमका काय हेतू होता? जात पंचायतीदरम्यान कोणती अनुचित घटना घडविण्याचा त्याचा मानस होता का? या सर्व बाबींचा तपास पोलीस करत असून आरोपीची सखोल चौकशी सुरू आहे. या कारवाईमुळे संभाव्य अनर्थ टळल्याची चर्चा परिसरात सुरू आहे.

Share this post: on Facebook