८७५ लिटर गावठी दारू व रसायन नष्ट; १० आरोपींवर कायदेशीर कारवाई
यशश्री अपडेट्स | भूम :
भूम पोलीस ठाण्याच्या हद्दीत सुरू असलेल्या अवैध दारू विक्री व हातभट्टी दारू निर्मितीविरोधात भूम पोलिसांनी मोठी धडक कारवाई केली आहे. पोलिसांनी एकाचवेळी विविध ठिकाणी विशेष ‘मास रेड’ मोहीम राबवत तब्बल १० ठिकाणी छापे टाकले. या कारवाईत मोठ्या प्रमाणावर गावठी हातभट्टी दारू तसेच दारू निर्मितीसाठी वापरण्यात येणारे सडवा रसायन जप्त करून घटनास्थळीच नष्ट करण्यात आले. या कारवाईत एकूण ८७५ लिटर मुद्देमाल, अंदाजे ७५ हजार ५०० रुपये किमतीचा, नष्ट करण्यात आला आहे.
भूम पोलीस ठाण्याच्या हद्दीत अवैध दारू निर्मिती व विक्रीला आळा घालण्यासाठी पोलिसांकडून विशेष मोहीम हाती घेण्यात आली होती. त्याअंतर्गत आरसोली, दिंडोरी तसेच भूम शहरातील इंदिरानगर आणि कल्याणनगर पारधी पिढी या भागांमध्ये पोलिसांच्या पथकांनी एकाचवेळी धाडी टाकल्या. अचानक करण्यात आलेल्या या कारवाईमुळे अवैध दारू व्यवसाय करणाऱ्यांमध्ये खळबळ उडाली.
१० ठिकाणी छापे; १० जणांवर कारवाई
या विशेष मोहिमेदरम्यान पोलिसांनी एकूण १० ठिकाणी रेड केली. कारवाईमध्ये अवैध गावठी हातभट्टी दारू तयार करून तिची विक्री किंवा साठवणूक करणाऱ्या संबंधित व्यक्तींविरुद्ध कायदेशीर प्रक्रिया सुरू करण्यात आली आहे. एकूण १० आरोपींवर कायदेशीर कारवाई करण्यात आल्याची माहिती पोलिसांकडून देण्यात आली.
२७५ लिटर गावठी दारू जप्त
पोलिसांच्या कारवाईदरम्यान २७५ लिटर गावठी हातभट्टी दारू आढळून आली. या दारूची किंमत प्रति लिटर १०० रुपये या प्रमाणे २७ हजार ५०० रुपये इतकी असल्याचे नमूद करण्यात आले आहे.
याशिवाय हातभट्टी दारू तयार करण्यासाठी वापरण्यात येणारे तब्बल ६०० लिटर सडवा रसायन पोलिसांच्या हाती लागले. या रसायनाची किंमत प्रति लिटर ८० रुपये प्रमाणे ४८ हजार रुपये इतकी आहे.
अशाप्रकारे गावठी दारू व दारू निर्मितीचे रसायन मिळून एकूण ८७५ लिटर मुद्देमाल, अंदाजे ७५ हजार ५०० रुपये किमतीचा, पोलिसांनी जप्त करून घटनास्थळीच नष्ट केला.
वरिष्ठ अधिकाऱ्यांच्या मार्गदर्शनाखाली कारवाई
ही धडक कारवाई पोलीस उपअधीक्षक तथा प्रभारी अधिकारी भूम श्री. अमोल मोहिते यांच्या मार्गदर्शनाखाली करण्यात आली. एपीआय खांडे आणि पीएसआय बर्डे यांच्या नेतृत्वाखाली पोलिसांचे पथक विविध ठिकाणी रवाना करण्यात आले होते.
कारवाईमध्ये पोलीस हेड कॉन्स्टेबल (बॅच क्र. १५४७) कवडे, महिला पोलीस हेड कॉन्स्टेबल (बॅच क्र. १२३१) मुल्ला, पोलीस अंमलदार (बॅच क्र. ८९०) कलाल, पोलीस अंमलदार (बॅच क्र. ५०३) कवडे, पोलीस अंमलदार (बॅच क्र. ३८७) कोरे, पोलीस अंमलदार (बॅच क्र. १६१४) जाधव यांच्यासह भूम पोलीस ठाण्यातील इतर पोलीस स्टाफने सहभाग घेतला.
अवैध धंदे करणाऱ्यांना पोलिसांचा इशारा
भूम पोलीस ठाण्याच्या हद्दीत अवैध दारू निर्मिती, विक्री तसेच इतर अवैध धंद्यांना आळा घालण्यासाठी पोलिसांकडून यापुढेही सातत्याने विशेष मोहिमा राबविण्यात येणार असल्याचे प्रशासनाकडून स्पष्ट करण्यात आले आहे. अवैध दारू तयार करणारे, विक्री करणारे अथवा अशा प्रकारच्या व्यवसायाला प्रोत्साहन देणाऱ्यांविरुद्ध कठोर कायदेशीर कारवाई केली जाईल, असा इशाराही पोलिसांनी दिला आहे.
एकाचवेळी दहा ठिकाणी करण्यात आलेल्या या ‘मास रेड’मुळे भूम शहरासह ग्रामीण भागात अवैध दारू व्यवसाय करणाऱ्यांमध्ये मोठी खळबळ उडाली असून, पोलिसांच्या या कारवाईचे नागरिकांकडून स्वागत होत आहे. अवैध दारू निर्मिती आणि विक्रीमुळे निर्माण होणाऱ्या सामाजिक समस्या रोखण्यासाठी अशा कारवाया सातत्याने सुरू ठेवण्याची अपेक्षा नागरिकांकडून व्यक्त होत आहे.
