भावांचे बँक खाते फ्रीझ करून संपूर्ण रक्कम परत; सायबर पोलिसांच्या तत्पर कारवाईचे सर्वत्र कौतुक
यशश्री अपडेट्स | धाराशिव :
ऑनलाईन आर्थिक फसवणुकीच्या वाढत्या घटनांमुळे नागरिकांमध्ये भीतीचे वातावरण असताना, धाराशिव सायबर पोलीस ठाण्याने उल्लेखनीय कामगिरी करत दोन भावांची फसवणूक झालेली तब्बल १९ लाख रुपयांची रक्कम परत मिळवून दिली आहे. तक्रार दाखल होताच तातडीने तपास सुरू करून आरोपींची बँक खाती गोठवणे, संबंधित बँकांच्या नोडल अधिकाऱ्यांशी सातत्याने पाठपुरावा करणे आणि कायदेशीर प्रक्रिया पूर्ण करून संपूर्ण रक्कम मूळ खात्यात वर्ग करणे, ही प्रक्रिया अत्यंत वेगाने पूर्ण करण्यात आली. या धडक कारवाईमुळे सायबर पोलिसांच्या कार्यक्षमतेचे सर्वत्र कौतुक होत आहे.
अणदूर येथील दोन भावांची झाली होती १९ लाखांची फसवणूक
पोलिसांकडून मिळालेल्या माहितीनुसार, धाराशिव जिल्ह्यातील अणदूर (वत्सलानगर) येथील रहिवासी मोहित सिद्धेश्वर भुजबळ आणि रोहित सिद्धेश्वर भुजबळ या दोन भावांची सायबर गुन्हेगारांनी विविध आमिषे आणि क्लृप्त्या वापरून ऑनलाईन फसवणूक केली होती.
या फसवणुकीत मोहित भुजबळ यांच्या खात्यातून १४ लाख रुपये, तर रोहित भुजबळ यांच्या खात्यातून ५ लाख रुपये, अशी एकूण १९ लाख रुपयांची रक्कम सायबर भामट्यांनी ऑनलाईन पद्धतीने लंपास केली.
तक्रार होताच सायबर पोलिसांची तातडीची कारवाई
फसवणूक झाल्याचे लक्षात येताच दोन्ही भावांनी विलंब न करता राष्ट्रीय सायबर गुन्हे तक्रार पोर्टल (NCCR) वर ऑनलाईन तक्रार नोंदवली. तक्रार प्राप्त होताच धाराशिव सायबर पोलीस ठाण्याने तातडीने तपास सुरू केला.
सायबर पथकाने संबंधित बँकांना अधिकृत पत्रव्यवहार करून फसवणुकीची रक्कम जमा झालेल्या आरोपींच्या विविध बँक खात्यांचा शोध घेतला. त्यानंतर संबंधित सर्व खाती तात्काळ फ्रीझ (गोठवण्यात) आली, त्यामुळे पुढील आर्थिक व्यवहार रोखण्यात यश आले.
नोडल अधिकाऱ्यांशी समन्वय; संपूर्ण रक्कम परत
खाती गोठवल्यानंतर सायबर पोलिसांनी विविध बँकांच्या नोडल अधिकाऱ्यांशी सातत्याने संपर्क साधत आवश्यक कायदेशीर प्रक्रिया पूर्ण केली. अखेर मोहित आणि रोहित भुजबळ यांची फसवणूक झालेली संपूर्ण १९ लाख रुपयांची रक्कम सुरक्षितपणे त्यांच्या मूळ बँक खात्यात परत वर्ग करण्यात आली.
सायबर फसवणुकीतील मोठी रक्कम अल्पावधीत परत मिळवून देण्यात आलेले हे यश जिल्ह्यातील नागरिकांसाठी दिलासादायक ठरले असून, तक्रार तात्काळ केल्यास फसवणुकीची रक्कम परत मिळण्याची शक्यता वाढते, हे या प्रकरणातून पुन्हा एकदा स्पष्ट झाले आहे.
वरिष्ठ अधिकाऱ्यांच्या मार्गदर्शनाखाली यशस्वी मोहीम
ही उल्लेखनीय कारवाई पोलीस अधीक्षक श्रीमती रितू खोखर आणि अप्पर पोलीस अधीक्षक सचिन पांडकर यांच्या मार्गदर्शनाखाली पार पडली.
या मोहिमेत सायबर पोलीस ठाण्याचे पोलीस निरीक्षक सचिन यादव, सहाय्यक पोलीस निरीक्षक कासुळे, पोलीस अंमलदार सूर्यवंशी, पोलीस हवालदार हालसे, पोलीस अंमलदार जाधवर, महिला पोलीस अंमलदार शेख, पोलीस अंमलदार बिराजदार, गाडे आणि शिंदे यांनी महत्त्वाची भूमिका बजावली.
नागरिकांना सायबर पोलिसांचे आवाहन
धाराशिव सायबर पोलिसांनी नागरिकांना सावध राहण्याचे आवाहन केले आहे. कोणत्याही अनोळखी मोबाईल क्रमांकावरून आलेले कॉल, मेसेज, संशयास्पद लिंक किंवा क्यूआर कोड यावर विश्वास ठेवू नये. तसेच बँक खाते, एटीएम, डेबिट-क्रेडिट कार्ड, ओटीपी किंवा इतर गोपनीय आर्थिक माहिती कोणालाही देऊ नये.
सायबर फसवणूक झाल्यास वेळ न दवडता राष्ट्रीय हेल्पलाइन क्रमांक १९३० वर संपर्क साधावा किंवा www.cybercrime.gov.in या पोर्टलवर तक्रार नोंदवून जवळच्या सायबर पोलीस ठाण्याशी संपर्क साधावा, असे आवाहन करण्यात आले आहे.
