🔴 काळाचा घाला! शेतीची मशागत करताना ट्रॅक्टरखाली चिरडून शेतकऱ्याचा मृत्यू

यशश्री अपडेट्स | भूम प्रतिनिधी
भूम तालुक्यातील वाकवड येथे शेतीची मशागत करताना ट्रॅक्टर पलटी होऊन ३४ वर्षीय तरुण शेतकऱ्याचा दुर्दैवी मृत्यू झाल्याची घटना शनिवारी (दि. १३) दुपारी अडीच ते तीन वाजण्याच्या सुमारास घडली. या दुर्घटनेत सुरेश रोहिदास अर्जुन (वय ३४) यांचा जागीच मृत्यू झाला. घरातील कर्ता पुरुष गेल्याने आई-वडील, पत्नी आणि अवघ्या सहा महिन्यांच्या बाळासह पाच लहान मुले पितृछत्राला मुकली आहेत.
मिळालेल्या माहितीनुसार, वाकवड फाट्याजवळील शेतात सुरेश अर्जुन हे ट्रॅक्टरद्वारे शेतीची मशागत करत होते. ट्रॅक्टर वळवित असताना एका चाकाचा तोल जाऊन ते तालीच्या खाली गेल्याने वाहनावरील नियंत्रण सुटले. यानंतर एमएच-२५ बीएफ-०२८६ क्रमांकाच्या ट्रॅक्टरने तब्बल तीन पलट्या खाल्ल्या. ट्रॅक्टर पुन्हा सरळ उभा राहिला, मात्र त्याखाली चेंगरल्याने सुरेश अर्जुन यांचा जागीच मृत्यू झाला.
घटनेच्या वेळी परिसरात कोणीही नसल्याने मदत मिळू शकली नाही. दूरवरून एका महिलेने हा अपघात पाहून कुटुंबीयांना माहिती दिली. कुटुंबीय घटनास्थळी धावून पोहोचले, मात्र तोपर्यंत खूप उशीर झाला होता.
सुरेश अर्जुन यांच्या पश्चात आई-वडील, पत्नी, तीन मुली आणि दोन मुले असा मोठा परिवार आहे. विशेष म्हणजे त्यांच्या धाकट्या अपत्याचे वय अवघे सहा महिने आहे. या हृदयद्रावक घटनेमुळे वाकवडसह संपूर्ण परिसरात शोककळा पसरली असून हळहळ व्यक्त केली जात आहे.